في ليلة ظلماء كالبدر ،،، كان مرزوق يلعب بلوت لحاله ،،، وكنت أنا مستلقي على ظهري ومغمض عيوني يقالي أحلام يقظة ،، المشكلة حتى أحلام اليقظة واللي هي يقظة ،، تطلعلي كوابيس !! ،،، وفي خضم هدوئنا واسترخائنا ،،، وبينما كان مرزوق يقول حكم صن اول بلوت شايب بنت ولد إكه (( جابها كلها ورى بعض يبي يعلمني إنه حافظها صم )) ،،، قلت له مرزوق ورى ما تاكل تراب وتجي تحلم معي ،،،، قال والله ودي أحلم معك بس المشكلة مافيه يد ثانية (( الحمار يحسبها لعبة بلاي ستيشن )) ،، قلت له ياخي تراك طفش ، سولف وقول أي شي ترى زهقنا وحنا على هالوضع ،،، !!! قاال خل أحلامك تنفعك ،،، قلت له خل نانسيك تنفعك ، تكفى يا مرزوق ودي تعلمني بقصة حياتك ،،،، !! قاال أنا أول عباارة في قصة حياتي كلمة ( النهاية ) ،،،!! قلت له طيب وبعد النهاية ؟ !!! قال اسم المؤلف !!!،،، قلت له كل ترااب بس ،، الشرهة على اللي يجلس معك ،،،، !!
قال طيب وش تبيني أقوول يعني ؟؟ وش تبي بقصة حياتي ،،، قلت له عشان نقتل هالزهق والملل اللي مغطي على حياتنا ،،!!! قال إذا انت الحين زهقان ، وأنا حياتي كلها زهق ، ولو أقص عليك قصة حياتي بتسمع زهق وبتزهق أكثر !!!!،،، ناظرت فيه وقلت كمل لعب بس أقسم بالله يا انت تسمع بالبلوت !!!،،،،،، غمضت عيوني عشان أحلم يقظة ،،،، !!!
وفجأة إلا نسمع صوت غريب في الغرفة ،،، قال مرزوق فيه حريقة جنبنا ،،، قلت له يمكن صح هذا صوت جرس انذاار ،،،!!! وكأن هالصوت مألوف لنا ،،، قلت خلني اشوف لا يكون أبوي ركب جرس في البيت وفيه واحد دق الجرس ،،،، !!! واروح افتح الباب ،، وما ألقى احد ، وأقول مييين ؟؟ (( يا بيض ، الناس يقولون مين قبل لا يفتحون )) !!! ،،، انقطع الصوت وأنا أرجع لأحلامي (( يغمض عيونه وهو واقف ما يبي يضيع الحلم )) ،،، وإلا مرة ثانية نسمع الصوت ،،، وأطالع في الغرفة إلا وأحصل غبااار يطلع من مكان الصوت ،،،، وأروح للمكاان وألقااه جوالي كان يرن ،،، هالجوال اللي له سنتين محد اتصل عليه ،، ولا انفصل بعد ، شكلهم الاتصالات ناسينه ،، والدليل إن رقمي للحين 9 ارقام ، ما اضافوا صفر ولا خمسة ولا اي شي ،،،!!
تقفل الجوال لأن البطارية خلصت ،،، ورحت شحنته ،، !!! وبعد ما شحنته شغلته مرة ثانية ،،، وبدل ما تطلع لي رسالة ترحيب ،،، طلعت لي عبارة ( يرحم ابوك غيرني ) !!! كسر خاطري هالجوال!! ،،، المهم لقيت صديقي فايز هو اللي متصل ،،، هذا فاايز درس معنا في الابتدائي ،، وهو من النااس الكااااش جداً ،،!! يعني يشتري ببسي وكت كات بدون ما يحسبها في الميزانية ،،، موب مثلي أنا ومرزوق !!!،،، المهم قلت أخاف اتصل عليه يقفل جواله لأن رقمي موب معروف ،،،، قمت فتحت الرسايل ،، وكتبت له بالحرف الواحد ( مسج كول = 1 ) ،، وارسلتها له !!! !!! وما ألقاه إلا وهو متصل علي !!!،، رديت عليه وقلت هلاااا والله بفاايز ،، من طول الغنايم جاب الغيبااات ،،، أخباارك يالدب ؟؟ !!! قاال : فاايز مين يرحم أمك ؟ أنا فيصل يا دلخ ،،، !!! (( وجالس تسرد لنا السيرة الذاتية لفايز وفي الأخير يطلع فيصل ؟ )) ... -- المهم إن فيصل نفس طريقة فايز ،، يعني كاش -- ،،، قلت هلاا والله فيصل أنورت وأسفرت ،،، قال يا هلا فيك ،،!!! قلت له خير وش عندك ؟ ،،، قال ياخي ودي مرة وحدة تتكلم بأدب ،، المهم يا غالي ، بإذن الله يوم الخميس الجاي بيكون عرسي في قاعة افراح ( ***** ) تكفى لا تنسى ، ودنا نشوفك في يوم العرس ،،،!!! قلت له والله ؟؟ بتعرس ؟ وشلون ؟ انت بالغ ؟ ،،،،، قال ايه بالغ وش عندك ؟؟ !!!
التفت على مرزوق وقلت له ترى فيصل بيعرس ،،،، قاال أفااا ، طيب وش التهمة ؟؟؟ ،، قلت لك بيعرس موب صادوه الشرطة !! ،، قال فاهم بس اقصد كيف بيعرس وبيعرس على من ؟؟؟ ،،،، قال فيصل الوعد الخميس لا تنسون ،،،،،!!!! قلت له طيب يا فيصل ما ودك تعلمنا اسم زوجتك ؟؟؟ ،، قال وش تبي فيها ؟؟ !!! قلت يمكن تكون أنا وتبي تسويها مفاجأة لي ؟؟؟ (( هذي آخرة أحلام اليقظة )) !! قال شف انا بعلمكم لأنكم كمخ وأعرفكم ما تسوون شي ،،، اسم زوجتي يا طويل العمر -- بيان -- ،،،،،!!! قلت له نعم ؟ وش اسمها ؟ !!!! قال -- بيان -- ،،،!!! التفت على مرزوق وقلت له وش تتوقع اسم زوجته ؟؟؟ !!! قال محماس ؟ !! قلت له لا يا حمار اسم بنت ،،، !!! قال مرزوق : مدري ؟ قالولك ابوها أنا ؟ ،،،،، !!! قلت له يقول اسمها -- بيان --!!! ،،،، ويفك امها ضحك مرزووق ويرمي ام الورق اللي في يده ،، ويقول والله ماهقيتها منك يا فيصل ،، أجل متزوج من وزارة الداخلية ،،،،!!! قال فيصل : وش يخربط هذا ؟؟؟ ،،،، قال مرزووق ياخي ما تسمعهم يقولون بيان من وزارة الداخلية ؟؟؟ ،،، وأنا اللي افقعها ضحك مع مرزوق ،،، قلت والله يا انت خطير يا فيصل ،،، أجل أنا سكلر من مكة ، وانت فيصل من الدمام ،،، وهذيك بيان من وزارة الداخلية ،،،، !!! ودمعت عيوني من الضحك وفيصل موب فاهم وش السالفة !! !!!
قلت له خله يصير شي في البلد ، وافتح الأخبار وبتسمعهم يقولون -- بيان من وزارة الداخلية : تم بحمد الله وكذا وكذا وكذا -- وانت أهدي هالعبارة لزوجتك !!،،، !!! ،،، قال فيصل الشرهة موب عليكم والله ،، ما شفتوا خير ، المهم الخميس لا تنسون !!!
--- مع الإعتذار لأي بنت اسمها بيان ،، ترى أنا ومرزوق ما نعرف شي في هالعالم ---
قفلت الجوال ودخلت في أحلام اليقظة وجالس أتخيل نفسي أنا المعرس ،،،، إلا وتذكرت اسم قاعة الأفراح واللي هي ( ***** ) ،، هالقاعة مشهوورة بأنها فخمة وغااالية ،،،،!!! قلت لمرزوق على القاعة وإنه لازم نضبط أمورنا لأن نحن بنقابل وجهاء الدولة ورؤساءها ،،،!!! قال مرزوق ، طيب لازم ندبر أمورنا ونشتري ملابس عدلة ،، تدري إن أجدد ثوب لي أخذته من أخوي لأنه قصر عليه ؟ ،،، قلت له اي والله وأنا بعد أجدد ثوب عندي لقيته في المسجد يوم المطر ،، فيه واحد من المصلين فصخ ثوبه لأنه مبلول وأخذته منه ،، وللحين معلقه في الغرفة !!! ،،، قال أجل خلنا نروح نشتري ملابس !!
قضينا أغراضنا واشترينا الأغراض اللي من النوع الرخيص ،،، العين قصيرة واليد بصيرة ،،،!!! وقلنا خلها كذا ما نفتحها لين يجي يوم العرس !!!
وصرنا متوترين هالأيام كأننا داخلين اختبار ،،، خايفين نفشل فيصل ،، ونسبب له إحراج مع ابو بيان ، خصوصاً إن أبوها ساكن في وزارة الداخلية ،،،!! قلت لمرزوق ما علينا ، حنا بس ندخل ونسلم ونقول من هالعبارات اللي يقولونها ونجلس ونتعشى ونطلع !!! قال ايه صح ...!!
جا يوم العرس ،،، وأنا مرزوق مستانسين بندخل مكان فخم ،،!! وفتحنا الثياب والشماغ والعقال ،، ولبسناها ،،، المشكلة إن شكلها يضحك ،، خصوصاً إنها بدون كوي ،،، يعني تلقى تطعيجات في الثوب على شكل مربع ومدري كيف !!! ،،، توكلنا على الله وتوجهنا لقاعة الأفراح ،،،، !! أصلاً من المواقف بغينا نهون أنا ومرزوق ،،،، أنواع السيارات اللي هناك ،، أرخص سيارة بـ 150 ألف ،، وأنا ومرزوق جايين بلموزين ونكااسره بعد نقوله بـ 5 ، وهو يقول لا بـ 10 !! !! ،، نزلنا وصرنا متوجهين للبوابة ،، ويوم جينا ندخل إلا جانا الحارس وقال بطايق الدعوة لو سمحتوا !!!! طلعت له بطاقة الأحوال ، وقلت خذ ،،،!!! قال لو سمحت بطاقة الدعوة عشان تدخل القاعة ،، قلت له وش بطاقته يا ابن الناس ؟ !! قال بطاقة دعوة عشان نتأكد إنكم مدعوين ،،،!! قلت له والله مدعوين وقسم بالله ،، وفتحت جوالي أقوله شف شف حتى المكالمات المستلمة ، شف مكتوب ( فيصل الكاش ) واللي هو المعرس ،،،!!! قال والله ما اقدر ادخلك غير ببطاقة دعوة !!!
جالسين نحاول فيه ،، لين شافنا فيصل ، وجا عند الحارس وقاله دخلهم أنا عازمهم !!! وسمح لنا بالدخول ،،، أنا وقتها حسيت فيصل عوائل ، أقصد حرمة ، يدخلنا أماكن العوائل !!! أول ما دخلنا القاعة وعيوننا تنحول ،،، نعن أم الحضارة والتطور ،،، أقصد نعن أم التصميم الروعة ،، والله ياهي قاعة ،،، قلت لفيصل بكم إيجار القاعة ؟؟ قال بـ 200 ألف !!! ،،، ناظرت فيه ، وقلت ليه انت بتسكن فيها سنة كاملة ؟؟ ،،، قال لا يا حمار هذي ليلة وحدة !!! انا انهبلت وصرت اناظر فيه وأقول ليلة وحدة بس ؟؟؟ !!! قال ايه وش فيها يعني ؟؟ !! قلت يقطع شكلك ليلة وحدة وتدفع 200 ألف ؟؟ نعن ابوك هالفلوس تقدر تشتري فيها 4 سيارات !!! قال يا رجال الله يعطينا ويعطيكم (( يحسبني اطر )) !!! قلت له انت يبي لك جلسة خاصة يوم تفضى ،،، قال ابشر ..!!!
سلمنا على المعازيم وبدينا من أبوه لين وصلنا لولد عمه الصغير ،،، كلهم جالسين عند البوابة ، صف واحد ،، ، ويوم خلصنا قلت لمرزوق تصدق إني بغيت أتوهق وأقول عظم الله أجرك !! هالمخابيل حاطين كل العائلة عند الباب يستقبلون ،، صار عزا هذا موب زواج ،،، قال ايه أصلاً أنا اسلم عليهم واقول إنا لله وإنا إليه راجعون !! ،،، قلت له ما ألومك ،،،،،!!! مشينا ومشينا ونحن نطاالع في القااعة ،، أقسم بالله يااهي شي ، مستعد أشتغل عامل نظافة عندهم ،، أو حتى يخلوني واقف كأني ديكور ،،، المهم إني أعيش فيها ،،، جلست أنا ومرزوق على كنب فخم ، وخفنا نوسخه من فخامته !!! قال مرزوق : سكلر يوم سلمنا ما شفت وزارة الداخلية ؟؟ قلت له اسكت بس خل هالخباال في البيت هنا خلك محترم !!!
انتظرنا ساعتين ،،، لين جا وقت العشا ،،، وقالوا العشا الله يحييكم (( ذكروني بسالفة صلاة العيد اثابكم الله )) !! ،، دخلنا قاعة العشا ،، ولقينا طاااولة طووويلة عليها ناس واقفين ،، قالي مرزوق سكلر اطلع منها شكلها قاعة اجتماعات موب هنا العشا ،،، قلت له يمكن صح ، بس خلنا نسأل ونتأكد ...،، سألنا واحد وقلنا له وين العشا ؟ ،، أشر على ناحية الإجتماع وقال هنا !! ،،، قلت يمكن هم يجتمعون ويتعشون في نفس الوقت ..!!! رحنا للطاولة ولقينا أشياء غريبة ونظام غريب ،، ياخذون صحون فاضية ويغرفون لنفسهم اكل ،،، !!! لقيت فيصل هناك واقف وقلت له ،، فيصل وش السالفة ؟ وش أدب الضيافة اللي عندكم؟ الضيف يغرف لنفسه ؟ وش نسوي الحين ؟ !! قاال هذا يسمونه بوفيه مفتوح ،،!! قلت طيب أدري بس نحن متعودين على البوفيه المقـفـول ،،،!! قال ياخي تعود طيب،،، !! قلت له طيب وشلون نتعشى الحين ؟ علمنا وش نسوي ،،،!!!
قال تعالوا وراي وسووا مثل اللي اسويه ،،، أخذ صحن وأخذنا صحون وملاعق ،،، وصار يمر على طبق طبق ويحط منه في صحنه !! وحنا وراه ولا ندري وش السالفة ،،،، لين وصل لطبق عليه شي غريب ،، قال هذا بيض سمك يا سكلر ،، قلت له ماشاء الله ،، بيض فقيه ؟ ولا بيض الوطنية؟ ،،، قال أنا اعلمك بسالفته الحين ،، بس انت خذ منه شوي وذوقه ،،، !!
خلصنا من هالقلق اللي وجع راسنا ،،، ورحنا نبي نجلس وناكل على الأرض ،، إلا فيصل يقول يا شباب لا تفشلوني ،،، فيه طاولات اجلسوا عليها ،،، قلنا له ما نعرف والله ،،، !!! قال عشاني هالمرة حاولوا !! جلسنا على الطاولة وجلسوا معنا ناس غثيثيييين !! يا كلون شوي شوي ،، كأنهم يبون يضيعون وقت عشان لا يطلعون من القاعة !! ،، عاد أنا ومرزوق أخذنا راحتنا وهات يا لحس وتشفيط وأصوات ،،، لين واحد من اللي كانوا جالسين معنا يقول ،، لو سمحتم ،، قفلوا فمكم وانتم تاكلون ،،،،!!! قلت له وشلون تبينا ناكل وفمنا مقفل ؟ من وين تبي الأكل يدخل ؟ من خشمنا ؟؟ !!! على طول الرجال أخذ عفشه وقام ،، واللي حوله بعد ،،، وصرت أنا ومرزوق لحالنا في الطاولة ،،،، وقلت لمرزوق شف هذا بيض السمك !! عمرك شفت مزرعة سمك ياخذون منها بيض ؟؟ ،، قال لا والله !!
خلصنا أكل ، وناظرنا بقية الطاولات والناس قاموا وخلصوا ،،، الصحون كلها مليانة !! والعمال صاروا ينظفون الطاولاات ويرمون الأكل في الزبالة !!! رحت لفيصل وقلت له ، كلم العمال لا يرمون الأكل وخلهم يتصدقون ،،، قال إن شاء الله ،!!!! ،، اسلوب واحد يصرف !!
جينا نبي نطلع وقلنا لفيصل كثر الله ملحك ،،،!!! قال وين بدري ؟؟ قلنا وش اللي بدري خلاص خلص العشاا ،،،، !!! قال اجلسوا فيه مفاجأة الحين ،،، قلت وشو بيطلع لنا بيان جديد ؟؟ !!! قال لا يا حمار الحين فيه طرب بيجينا مطرب مشهور !! ،،، قلنا طيب ،،، وجلسنا وسمعنا لهالمطرب المشهور اللي كلكم تعرفونه !!،،، وخلص الحفل الغنائي !!! وبدأ المعازيم يطلعون !!
لمحت فيصل جالس لحاله ،، رحت أنا ومرزوق عنده ،،، قلت لفيصل ،، تعال الحين ودي أتفاهم معك !! قال وش عندك ؟؟ !!! قلت من جدك هالقاعة بـ 200 ألف ليلة وحدة ؟ قال ايه ، هذا غير العشا وغير المطرب !! قلت وشلون ،، قال العشا يا طويل العمر كلفنا 10 آلاف للرجال ، ومثله للحريم !!،، قلت له خير ؟ بناكل ألماس نحن ؟؟ ! قال شايف هذاك البيض اللي انت أكلته ؟؟ قلت ايه ،، قال هذا الكافيار !! ،، قلت إن شاء الله مسيار بعد وش يعني ؟؟ ،،، قاال هذاا لحاله بكذا ألف (( وقال مبلغ كبير )) !! قلت هالبيض ؟ بهالسعر ؟ ،، قال ايه !! قلت سبحان الله ،، أنا ومرزوق فول وتميس بريالين ونشبع ،،، وهذا اللي بكم ألف ولا تشبع ولا شي ،،،!!
وسكت شوي أفكر في اللي قااله ،، إلا مرزوق قال لفيصل يااخي ما توقعت إنك بتعزم المطرب ( ****** ) انت صديقه ؟؟ ،، قال لا موب صديقه ،، استئجرناه ،،،،!! قال مرزوق والله لو إنه شقة عشان تستأجره ،، وين نحن ؟؟ !!! قال ايه استئجرناه ،، والليلة بـ 100 ألف !! !!!،،، ناظرت فيه وقلت نعم ؟؟ بـ 100 ألف ؟؟ !! قال ايه ،،،، قلت له تعال تعال ،،، القاعة 200 ،، والأكل 20 ،، والمطرب 100 ،،، 320 ألف هذي الليلة بس ؟ !!! قال ايه هذا غير الأغراض اللي استئجرناها ،، !!! قلت ليلة وحدة 320 ألف ؟؟ كنت تقدر تشتري همر !! قال ايه السيارة حقت العرس همر ،، اشتريتها قبل أسبوع !! قلت له وليه طيب هالتكاليف ؟؟ ،،، قال هذي شروط أهل العروسة يكون الزواج في هالقاعة وتكون هذي مواصفاته !!
قلت له ماشاء الله ،،، الله يزيدها عليكم !!
طلعت من القاعة أنا ومرزوق ،،، وأنا مصدوم بصراحة ،، !!! قلت لمرزوق بالله هذا كله زواج ؟؟ ،،، قال ايه زواج أجل وش تحسبه انت ؟ عقيقة أو حفلة نجاح ؟ !!!!! قلت زواج يكلف 320 ألف غير السيارة وغير الأغراض الثانية ؟!!! قال ياخي وش فيها طيب ،، أنا يوم اصير مضيف بتزوج في طيارة ،، والطيارة كم سعرها ؟؟ بيكون في الملايين !! !! ،،، قلت له هذا غير المهر وغير ،،،، قال مرزوق المهر ما يهم ، ناخذ وحدة رخيصة ،،، قلت له يا حمار ما اقصد مهر زوجتك ،، أقصد مهر بيان ،، انت مهر زوجتك ورقتين بنت وورقة إكه وخلااص ،،،!!! ،،، قال مرزوق : بياان راس مالها تلفزيون وتشوف اسمها في الأخباار وخلاااص ،،،!!! قلت له تبي تلعب بلوت ؟؟ قال ايه !!
قلت أجل خلنا نرجع البيت ونلعب بلوت ،،، بلا زواج بلا هم ،،!!! والله إن كان هذا هو الزواج ،، فما نبيه بصرحة !! ....
صن حكم ، اكه ديمن ،، وزع ،، نصيبي ،، بلوت شايب بنت ولد ،،، هاص ،، حكم ثاني <<<<< هذا أنا ومرزوق نلعب بلوت بعد ما بطلت من عادة أحلام اليقظة بعد ما شفت الأحلام قدام عيوني ،،، ليلة وحدة تكلف 320 ألف ؟؟
الخميس يوليو 24, 2008 10:23 am
